Rektor tabrigi

Rektor tabrigi

Ўқитувчи ва мураббийлар куни муносабати билан институт ректорининг профессор-ўқитувчилар ҳамда жамоанинг барча аъзоларига

БАЙРАМ ТАБРИГИ

Аввало сизларни, энг улуғ ва шарафли касб эгаларини айни кунларда кенг нишонланаётган қутлуғ айём – Ўқитувчи ва мураббийлар куни билан чин қалбимдан табриклайман. Барчангизга ўзимнинг эзгу тилакларимни изҳор этишдан бахтиёрман.

Мана 20 йилдирки, мамлакатимизда Ўқитувчи ва мураббийлар куни умумхалқ байрами сифатида нишонланиб келмоқда. Бу эса Ўзбекистон республикасининг биринчи Президенти Ислом Абдуғаниевич Каримовнинг биз ўқитувчи ҳамда мураббийларга бўлган юксак ҳурмат-эътиборининг амалий ифодаси бўлиб қолмоқда.

Бугун биз Ўқитувчи ва мураббийлар куни деб ном олган гўзал байрамимизни нишонлар эканмиз, ўзининг истеъдоди ва маҳоратини, кўз нури ва қалб қўрини бахш этиб, ёш авлодимизга билим, илму фан сирларини, одамийлик сабоқларини ўргатаётган устозлар эканлигимиз билан ҳар қанча фахрлансак арзийди. Зеро устоз ва мураббийлар қўлидан таълим-тарбия олган минг-минглаб инсонлар қадрдон ўқитувчилари олдида ўзларини умрбод қарздор, деб биладилар ва уларни эъзозлаб доимо ҳурмат қиладилар.

Ҳурматли устозлар!

Ҳар йили касб байрамимизни нишонлар эканмиз, ўтган даврда қўлга киритган муваффақиятларимизни, самарали якунланган илмий изланишларимизни, иқтидорли ёш ҳамкасбларимизнинг саъй ҳаракатларини эслаб қувонамиз. Ўзимизнинг тинимсиз меҳнати билан ҳурмат қозонган жамоадошларимизга янгидан янги омадлар тилаймиз.

Шу ўринда мен институтимиз олимларининг, ёш мутахассисларимизнинг кўплаб хорижий мамлакатлардаги олийгоҳлар билан ҳамкорликдаги фаолиятларини йилдан йилга мустаҳкамлаб бораётганлигини алоҳида таъкидламоқчи эдим. Бундай алоқалар айниқса Европадаги машҳур олийгоҳлар, Япониядаги ҳамкасбларимиз билан янада ривожланмоқда. Ёш мутахассисларимиз жаҳоннинг бир қатор ривожланган мамлакатларида бўлишиб, ўзаро тажриба алмашаяпти, малакаларини ошириб келишмоқда. Ўз навбатида кўп тармоқли малакали кадрлар тайёрлаётган институтимизнинг фаолияти, сиз азиз устозларнинг амалий ишларингиз касбдошларимизда илиқ таассуротлар қолдириб, кўпчиликни қизиқтираётгани ҳам сир эмас. Кейинги пайтларда республика миқёсидаги тадбирлар ва ҳатто Халқаро анжуманлар севимли олийгоҳимизда ўтказилаётганидан хақли равишда фахрлансак арзийди. Шу йилнинг 9-10 июнь кунлари олийгоҳимизда бўлиб ўтган “Ўзбекистон аёлларининг фан, таълим, маданият ва бизнес соҳасидаги ютуқлари” мавзусидаги Халқаро анжуман худди шундай тадбирларининг бири бўлди.

Республика раҳбариятининг биз устоз ва мураббийларга самарали меҳнат қилиш, илмий изланиш, ўз иқтидорлармизни тўла намойиш этиш учун кўрсатаётган ғамхўрликлари ҳақида эслаш ўринли. Машғулотларни сўнгги русумдаги технологиялар билан жиҳозланган илмий-тадқиқот лабораториялари, ўқув хоналарида етарли даражадаги кўргазмалар асосида олиб борилаётганлиги ҳар бир устозга хуш кайфият бағишлаши тайин. Ўзбекистон Республикаси Президентининг 2017 йил 20 апрелдаги “Олий таълим тизимини янада ривожлантириш чора-тадбирлари тўғрисида”ги қарорига асосан 2017-2021 йилларда институтда янги ўқув биноси қурилиши, ўқув-лаборатория базасини модернизациялаш учун 17 та ўқув-лаборатория мажмуаси барпо этишга маблағ ажратилгани биз профессор-ўқитувчилар фаолияти доимий эътиборда эканлигининг яққол далилидир. Бизга кўрсатилаётган бу каби ғамхўрликлар жамоадаги илмий муҳитни, кўп тармоқли малакали кадрлар етиштиришдаги амалий ишларимизни янада яхшилашга хизмат қилиши шубҳасиз.

Ҳурматли жамоадошлар !

Сиз азизларни яна бир бор 1 октябрь – Ўвитувчи ва мураббийлар куни билан табриклайман. Барчангизга сиҳат-саломатлик, хонадонингизга файзу барака тилайман. Масъулиятли ва шарафли касбингизда доимо омад ёр бўлсин !

Алишер УСМАНҚУЛОВ,

институт ректори, техника

фанлари доктори.